چین نے امریکا اور ایران کے درمیان جاری سفارتی عمل میں پیش رفت کا خیرمقدم کرتے ہوئے آبنائے ہرمز کو فوری طور پر مکمل طور پر کھولنے کی ضرورت پر زور دیا ہے۔ چینی حکام کا کہنا ہے کہ عالمی تجارت اور توانائی کی ترسیل کے تسلسل کے لیے اس اہم بحری گزرگاہ کی بحالی ناگزیر ہے۔
چینی وزارت خارجہ کے ترجمان لن جیان نے بیجنگ میں ایک پریس بریفنگ کے دوران کہا کہ آبنائے ہرمز بین الاقوامی بحری نقل و حمل اور توانائی کی عالمی سپلائی چین میں کلیدی حیثیت رکھتی ہے۔ انہوں نے امید ظاہر کی کہ تمام متعلقہ فریق ایسے اقدامات کریں گے جن سے اس آبی گزرگاہ میں معمول کی سرگرمیاں جلد بحال ہو سکیں۔
ترجمان نے امریکا اور ایران کے درمیان ابتدائی مفاہمتی یادداشت کے متن پر اتفاق کو مثبت سفارتی پیش رفت قرار دیتے ہوئے کہا کہ چین خطے میں کشیدگی کم کرنے اور مذاکراتی عمل کو آگے بڑھانے والی ہر کوشش کی حمایت کرتا ہے۔ ان کے مطابق تنازعات کے حل کے لیے سفارت کاری اور مکالمہ ہی مؤثر اور پائیدار راستہ ہے۔
لن جیان نے پاکستان کی سفارتی کاوشوں کا خصوصی طور پر ذکر کرتے ہوئے کہا کہ بیجنگ مذاکراتی عمل میں پاکستان کے تعمیری کردار اور ثالثی کی کوششوں کو قدر کی نگاہ سے دیکھتا ہے۔ انہوں نے کہا کہ پاکستان نے مختلف فریقین کے درمیان رابطوں کو فروغ دینے اور اعتماد سازی کے ماحول کی تشکیل میں اہم کردار ادا کیا ہے۔
چینی وزارت خارجہ کے مطابق مشرق وسطیٰ میں کشیدگی میں کمی نہ صرف علاقائی استحکام کے لیے اہم ہے بلکہ اس کے مثبت اثرات عالمی معیشت، توانائی کی منڈیوں اور بین الاقوامی تجارت پر بھی مرتب ہوں گے۔ چین نے ایک بار پھر تمام فریقین پر زور دیا کہ وہ اختلافات کے حل کے لیے مذاکرات اور سفارتی ذرائع کو ترجیح دیں۔
About The Author
