فیفا ورلڈ کپ 2026 میں فرانس اور ناروے نے اپنی شاندار کارکردگی کا سلسلہ برقرار رکھتے ہوئے ناک آؤٹ مرحلے کے لیے کوالیفائی کر لیا۔ دونوں ٹیموں نے اپنے اپنے میچز میں متاثر کن کھیل کا مظاہرہ کیا جبکہ اسٹار فارورڈز کیلیان ایمباپے اور ایرلنگ ہالینڈ ایک بار پھر اپنی ٹیموں کی کامیابی کے ہیرو ثابت ہوئے۔
فرانس نے عراق کو 3-0 سے شکست دے دی
فلاڈیلفیا اسٹیڈیم میں کھیلے گئے گروپ آئی کے میچ میں فرانس نے عراق کو یکطرفہ مقابلے کے بعد 3-0 سے شکست دی۔ میچ کے 14ویں منٹ میں کیلیان ایمباپے نے گول کر کے فرانس کو برتری دلائی۔
پہلے ہاف کے اختتام تک فرانس کو ایک گول کی برتری حاصل تھی، تاہم شدید بارش کے باعث دوسرے ہاف کا آغاز دو گھنٹے 15 منٹ تاخیر سے ممکن ہو سکا۔
کھیل دوبارہ شروع ہونے کے بعد ایمباپے نے 54ویں منٹ میں اپنا دوسرا گول اسکور کیا، جس کے ساتھ ورلڈ کپ میں ان کے مجموعی گولوں کی تعداد 16 ہو گئی اور انہوں نے جرمنی کے سابق عظیم اسٹرائیکر میروسلاو کلوزے کے ریکارڈ کی برابری کر لی۔
فرانس کی جانب سے تیسرا گول عثمان ڈیمبیلے نے 66ویں منٹ میں اسکور کیا، جس کے بعد عراق کے لیے واپسی کی تمام امیدیں ختم ہو گئیں۔ اس کامیابی کے ساتھ فرانس نے ناک آؤٹ مرحلے میں اپنی جگہ یقینی بنا لی، جبکہ عراق کو اگلے مرحلے تک رسائی کے لیے اپنے آخری میچ میں کامیابی درکار ہوگی۔
ایرلنگ ہالینڈ کے دو گول، ناروے بھی آخری مرحلے میں
دوسری جانب نیو جرسی میں کھیلے گئے گروپ آئی کے ایک اور مقابلے میں ناروے نے سینیگال کو سنسنی خیز مقابلے کے بعد 3-2 سے شکست دے کر ناک آؤٹ مرحلے میں رسائی حاصل کر لی۔
ناروے کے لیے پہلا گول مارکس پیڈرسن نے کیا، جبکہ دوسرے ہاف میں مارٹن اوڈیگارڈ کے عمدہ پاس پر ایرلنگ ہالینڈ نے اسکور کو 2-0 کر دیا۔
سینیگال کی جانب سے اسماعیلہ سار نے ایک گول کے ذریعے مقابلہ دلچسپ بنایا، تاہم ہالینڈ نے ایک اور گول اسکور کر کے اپنی ٹیم کی برتری مستحکم کر دی۔
اضافی وقت میں سینیگال نے دوسرا گول بھی کر لیا، لیکن برابری حاصل کرنے میں ناکام رہی اور ناروے نے 3-2 سے کامیابی اپنے نام کر لی۔
اس میچ میں دو گول کرنے والے ایرلنگ ہالینڈ نے ورلڈ کپ میں ناروے کے لیے اپنے مجموعی گولوں کی تعداد چار کر دی، جو کسی بھی ناروے کے کھلاڑی کے مقابلے میں سب سے زیادہ ہے۔
مسلسل دوسری کامیابی کے بعد فرانس اور ناروے نے گروپ آئی سے ناک آؤٹ مرحلے میں جگہ بنا لی، جبکہ سینیگال کی امیدیں ابھی برقرار ہیں اور اسے آخری گروپ میچ میں عراق کے خلاف کامیابی درکار ہوگی۔
About The Author
