پاکستان نے عالمی ڈاک ٹکٹ نمائش میں تاریخ رقم کر دی، محمد عارف بالاگام والا نے گولڈ میڈل جیت لیا -

مکاؤ: پاکستان نے عالمی ڈاک ٹکٹ (فلاٹلی) کی دنیا میں ایک تاریخی کامیابی اپنے نام کر لی، جہاں ممتاز پاکستانی فلاٹلسٹ اور تاجر محمد عارف بالاگام والا (تمغۂ امتیاز) نے مکاؤ 2026 اسپیشلائزڈ ورلڈ اسٹامپ نمائش میں گولڈ میڈل جیت کر ایک نیا عالمی ریکارڈ قائم کر دیا۔

یہ اعزاز حاصل کرنے کے بعد محمد عارف بالاگام والا پاکستان کی 79 سالہ تاریخ میں پہلے فلاٹلسٹ بن گئے ہیں جنہوں نے پانچ فریم کیٹیگری میں یہ باوقار عالمی گولڈ میڈل اپنے نام کیا، جبکہ عالمی فلاٹلی کی تاریخ میں بھی یہ ایک منفرد سنگ میل قرار دیا جا رہا ہے۔

محمد عارف بالاگام والا کو یہ اعزاز ان کے تحقیقی اور نادر کلیکشن "British India Stamps Overprints Pakistan 1947–1949” پر دیا گیا، جس میں قیام پاکستان کے ابتدائی دور میں استعمال ہونے والے اوور پرنٹ شدہ ڈاک ٹکٹوں کی تاریخی اور تحقیقی دستاویزات شامل ہیں۔

بین الاقوامی ججز نے اس کلیکشن کو پاکستان کی ابتدائی ڈاک تاریخ پر مبنی منفرد، جامع اور اعلیٰ تحقیقی نمائش قرار دیتے ہوئے اسے گولڈ میڈل کا مستحق قرار دیا۔

یہ محمد عارف بالاگام والا کی 2026 میں حاصل ہونے والی ایک اور بڑی عالمی کامیابی ہے۔

اس سے قبل وہ دبئی 2026 ورلڈ اسٹامپ نمائش میں اپنے کلیکشن "Pakistan Overprints on India Stationery 1947–1949” پر بھی گولڈ میڈل حاصل کر چکے ہیں۔

اسی سال انہوں نے امریکا میں منعقد ہونے والی Boston World Stamp Expo 2026 میں انتہائی باوقار Court of Honour اعزاز بھی حاصل کیا، جو صرف عالمی معیار کے غیر معمولی کلیکشنز کو دیا جاتا ہے۔

وہ اس اعزاز تک پہنچنے والے بھی پاکستان کی تاریخ کے پہلے فلاٹلسٹ ہیں۔