ایرانی صدر مسعود پزشکیان نے کہا ہے کہ ایران اور پاکستان کے درمیان مزید ہم آہنگی اور تعاون کی ضرورت پہلے سے بڑھ گئی ہے۔
پاکستان کے یوم آزادی کے موقع پر اپنے پیغام میں ایرانی صدر نے دونوں ممالک کے قریبی تعلقات کو اجاگر کیا۔ انہوں نے کہا کہ ایران اور پاکستان کے مشترکہ مفادات اور تقدیریں پہلے سے کہیں زیادہ ایک دوسرے سے جڑی ہوئی ہیں۔
مسعود پزشکیان نے پاکستان کی کامیابیوں کو خراج تحسین پیش کیا۔ انہوں نے کہا کہ یوم آزادی پاکستان کی عظیم قوم کی کامیابیوں کو سراہنے کا قیمتی موقع ہے۔
ایران پاکستان تعلقات میں نئے مرحلے کا آغاز
ایرانی صدر نے کہا کہ پاکستان کا یوم آزادی ایران اور پاکستان کے دیرینہ و تزویراتی تعلقات کو مزید گہرا کرنے کا نیا موڑ ہے۔
انہوں نے واضح کیا کہ ایران پاکستان کے ساتھ جامع تعلقات مزید مضبوط بنانے کے عزم پر قائم ہے۔
مسعود پزشکیان نے دونوں ممالک کے درمیان موجود وسیع تعاون کو مزید آگے بڑھانے کی ضرورت پر بھی زور دیا۔
ایرانی صدر نے کہا کہ باہمی اعتماد اور احترام کی بنیاد پر دوطرفہ تعلقات کو مزید مستحکم کیا جا سکتا ہے۔
انہوں نے کہا کہ ایران اور پاکستان کے پاس مختلف شعبوں میں وسیع صلاحیتیں موجود ہیں۔ ان صلاحیتوں سے بہتر فائدہ اٹھانے کے لیے مزید مؤثر اقدامات کی ضرورت ہے۔
مسعود پزشکیان نے اس سلسلے میں ایران کی جانب سے تعاون جاری رکھنے کے عزم کا اظہار کیا۔
ایرانی صدر نے پاکستان کی ترقی، خوشحالی اور سربلندی کے لیے نیک خواہشات کا اظہار کیا۔
انہوں نے ایران اور پاکستان کے دیرینہ برادرانہ تعلقات کے مزید مضبوط اور مستحکم ہونے کی دعا بھی کی۔
مسعود پزشکیان کا بیان دونوں ممالک کے درمیان تاریخی، برادرانہ اور تزویراتی روابط کو مزید آگے بڑھانے کے ایرانی عزم کی عکاسی کرتا ہے۔
About The Author
