ناروے کی نوبیل کمیٹی نے جنوبی افریقا سے تعلق رکھنے والی قانون دان ناوانیتھم ’’ناوی‘‘ پلے کو نوبیل امن انعام 2026 دینے کا اعلان کیا ہے۔ انہیں امن، عالمی قانون اور بین الاقوامی انصاف کے فروغ کے لیے طویل خدمات کے اعتراف میں یہ اعزاز دیا گیا۔
ناوی پلے نے اپنے قانونی اور عدالتی کیریئر میں انسانی حقوق اور بین الاقوامی انصاف کے لیے اہم کردار ادا کیا۔ وہ اقوام متحدہ کی سابق ہائی کمشنر برائے انسانی حقوق بھی رہ چکی ہیں۔ انہوں نے مختلف بین الاقوامی عدالتی اداروں میں بھی خدمات انجام دیں۔
نوبیل امن انعام کے اعلان کے بعد اقوام متحدہ کے دفتر برائے انسانی حقوق نے اس فیصلے کا خیرمقدم کیا۔دفتر کی ترجمان شابیا مانٹو نے جنیوا میں صحافیوں سے گفتگو کرتے ہوئے کہا کہ ناوی پلے انسانی حقوق کی پُرعزم محافظ اور علم بردار رہی ہیں۔انہوں نے اس بات پر زور دیا کہ انسانی حقوق کے تحفظ کے لیے مزید لگن اور عزم کی ضرورت ہے۔
نوبیل امن انعام 2026 کا اعلان رواں ہفتے طب، طبیعیات، کیمیا اور ادب کے انعامات کے بعد کیا گیا۔ معاشی علوم کے نوبیل انعام کا اعلان 12 اکتوبر کو متوقع ہے۔گزشتہ سال وینزویلا کی اپوزیشن رہنما ماریا کورینا ماچاڈو نے نوبیل امن انعام حاصل کیا تھا۔ انہیں جمہوری حقوق کے فروغ اور وینزویلا میں پُرامن سیاسی تبدیلی کی جدوجہد کے اعتراف میں یہ اعزاز دیا گیا تھا۔
About The Author
