پشاور – بھارتی فضائیہ نے پاکستانی سرحد کے نزدیک گجرات کے علاقے کچھ میں 20 سے 21 جنوری تک بڑے پیمانے پر فضائی مشقیں کرنے کا اعلان کیا ہے۔
میڈیا رپورٹس کے مطابق ان مشقوں میں رافیل، سخوئی 30 ایم آئی، جیگوار اور دیگر فرنٹ لائن لڑاکا طیارے حصہ لیں گے۔ مشقوں میں تیز رفتار پروازیں، ہوائی لڑائی کی تربیت اور ممکنہ طور پر لائیو فائرنگ یا بمباری کی مشقیں شامل ہوں گی۔
اس دوران متعلقہ فضائی حدود کو بین الاقوامی پروازوں کے لیے بند کر دیا جائے گا اور صرف ایئر فورس کی تربیتی کارروائیوں کے لیے مخصوص کیا جائے گا۔ محدود فضائی زون بھارت کی جنوبی سرحد کے حساس علاقوں پر محیط ہے، جس میں بحیرہ عرب، سر کریک، راجکوٹ اور احمد آباد کے نزدیک علاقے شامل ہیں۔
تجزیہ کاروں کا کہنا ہے کہ دونوں ممالک کے درمیان موجودہ کشیدگی کی صورتحال میں کسی بھی عسکری سرگرمی کو خطے کے امن کے لیے حساس سمجھا جاتا ہے۔ پاکستانی حکام کی جانب سے اس اعلان پر تاحال کوئی باضابطہ ردِعمل سامنے نہیں آیا۔
