(عبدالستاراعوان)
ممتازصحافی،شاعر اور ادیب محترم سعید احمد علوی چند روز قبل بہت محبت واپنائیت سے تشریف لائے اوراپنی شعری کاوش’’زیست‘‘کاتحفہ پیش کیا۔علوی صاحب اے جی نیوز سے وابستہ سینئر تجزیہ نگار اور صاحبِ اسلوب اینکرکے ساتھ قادرالکلام شاعر بھی ہیں۔
انہیں ادب کانفیس اور گہرا ذوق عطا ہوا ہے۔ان کے مزاج میں علم و آگہی،فکر و شعور اور احساس کی ایک خوبصورت آمیزش دکھائی دیتی ہے۔ان کی رگوں میں علویوں کا خون دوڑتا ہے اور وہ اپنے اسلاف کی روشن روایت کو نہ صرف سینے سے لگائے ہوئے ہیں بلکہ اسے اپنے قلم کے ذریعے آگے بڑھانے کا حوصلہ بھی رکھتے ہیں۔حق بات کہنااورسچ کا ساتھ دیناان کے مزاج میں نمایاں ہے۔ان کی شاعری میں سرورِ کونین حضرت محمد مصطفیٰ ﷺ سے بے پایاں عقیدت اور صوفیائے کرام سے والہانہ محبت پائی جاتی ہے۔انسانی اقدار کا احترام ان کے اشعار کو ایک خاص معنویت عطا کرتا ہے۔علوی صاحب معاشرے کے دکھ،محرومیوں،ناہمواریوں اور انسانی مسائل سے بھی آنکھیں نہیں چراتے اور اپنے شعری احساس کے ذریعے ان کی نشاندہی کرتے ہیں۔
’’زیست‘‘محض اشعار کا مجموعہ نہیں بلکہ سعید احمد علوی کے فکری سفر،قلبی کیفیات، ادبی شعور اور زندگی کے تجربات کا آئینہ بھی ہے۔
____نمونہ کلام____
یہ عوام غلام ابن غلام ہے
ہر نفس پر یہاں خوف کا قیام ہے
بند آنکھوں سے خواب دیکھتے ہیں سب
حاکموں کے ستم کا ہی احترام ہے
حق کی باتیں کریں توسزا ملے
یہاں ہر اک زبان پر پہرہ تمام ہے
———————
گنج بخش فیض عالم،داتا لاہور والے
سب کے دلوں کے رہبر،داتا لاہور والے
لاکر دیاہے انہوں نے راہ کا سراغ
راہ وفا کے راہی،داتا لاہور والے
ہردل میں ہے ان کی محبت کا ایک جہاں
رحمت کے ہیں پیکر،داتا لاہور والے
———————-
پڑھ جائے بچہ غریب کا،یہ سردار کوقبول نہیں
ظلم کا قلعہ گر پڑے،یہ دربار کو قبول نہیں
علم کی شمع جل اٹھے تو چھٹ جائے ہر اندھیرا
- اندھیروں کو روشنی کا سفر،سرکار کو قبول نہیں
