چیئرمین پاکستان تحریک انصاف بیرسٹر گوہر علی خان لاہور پہنچ گئے جہاں انہوں نے پنجاب انسٹیٹیوٹ آف کارڈیالوجی (پی آئی سی) کا دورہ کرکے وہاں زیر علاج شاہ محمود قریشی سے ملاقات کی۔
رکن قومی اسمبلی زین قریشی بھی بیرسٹر گوہر علی خان کے ہمراہ موجود تھے۔
بیرسٹر گوہر علی خان اور زین قریشی نے شاہ محمود قریشی سے ملاقات کے دوران ان کی خیریت دریافت کی۔
یاد رہے کہ کوٹ لکھپت جیل میں قید پاکستان تحریک انصاف کے سینئر رہنما اور سابق وزیر خارجہ شاہ محمود قریشی کو مختلف طبی ٹیسٹوں کے لیے پنجاب انسٹی ٹیوٹ آف کارڈیالوجی (پی آئی سی) منتقل کر دیا گیا ہے۔
چند روز قبل وہ اپنی بیرک میں چہل قدمی کر رہے تھے کہ اچانک چکر آنے کے باعث زمین پر گر پڑے تھے جس سے ان کے گھٹنے اور بازو پر شدید چوٹیں آئی تھیں۔
