ٹرمپ انتظامیہ نے وائس آف امریکہ (VOA) کے متعدد اوورسیز دفاتر بند کرنے کا فیصلہ کر لیا ہے۔ اس فیصلے کے تحت 6 اوورسیز نیوز بیوروز اور 4 مارکیٹنگ دفاتر بند کیے جائیں گے۔ ضرورت پڑنے پر نشریات کو کنٹریکٹرز کے ذریعے جاری رکھنے کا امکان ہے۔
اوورسیز دفاتر میں VOA پاکستان، انڈونیشیا، کینیا اور چیک ریپبلک شامل ہیں۔ مزید برآں، جرمنی، تھائی لینڈ اور بوٹسوانا میں VOA کے ریڈیو اسٹیشنز بھی بند کیے جائیں گے۔
امریکی میڈیا رپورٹس کے مطابق، صدر ٹرمپ نے مارچ میں وائس آف امریکہ کی کچھ سروسز بند کرنے کا حکم دیا تھا، تاہم اپریل میں امریکی فیڈرل جج نے VOA کی سروسز کو دوبارہ بحال کرنے کا حکم دیا تھا۔
یہ اقدام امریکی سرکاری نشریات کی عالمی موجودگی اور آپریشنل ڈھانچے پر اثر ڈالنے کا سبب بن سکتا ہے، جس پر میڈیا حلقوں میں تشویش کا اظہار کیا جا رہا ہے۔
