فلپائنی سینیٹ میں فائرنگ کی آوازیں، سینیٹر ڈیلا روزا کی ممکنہ گرفتاری پر ہنگامہ -

فلپائن کی سینیٹ میں اُس وقت شدید افراتفری پھیل گئی جب عمارت کے اندر گولیوں کی آوازیں سنی گئیں۔ غیر ملکی خبر رساں ادارے عالمی میڈیا کے مطابق واقعہ ایسے وقت پیش آیا جب سینیٹر Ronald dela Rosa نے دعویٰ کیا کہ انہیں منشیات کے خلاف جنگ سے متعلق مقدمات میں فوری گرفتاری کا سامنا ہوسکتا ہے۔

رپورٹس کے مطابق گولیوں کی آوازیں سننے سے کچھ دیر قبل سینیٹ کی عمارت میں 10 سے زائد فوجی اہلکار داخل ہوتے دیکھے گئے تھے۔ عینی شاہدین کے مطابق واقعے کے بعد سیکیورٹی اہلکاروں نے میڈیا نمائندوں اور عملے کو فوری طور پر پیچھے ہٹنے کی ہدایت کی جبکہ عمارت کے اندر خوف و ہراس پھیل گیا۔

رائٹرز کی لائیو اپ ڈیٹس کے مطابق گولی چلانے والے شخص یا افراد کی شناخت فوری طور پر واضح نہیں ہوسکی۔ سوشل میڈیا اور مقامی ذرائع پر جاری ویڈیوز میں سینیٹ کی عمارت کے اندر بھگدڑ اور سیکیورٹی اہلکاروں کی نقل و حرکت دیکھی جا سکتی ہے۔

بعد ازاں فلپائن کے وزیر داخلہ Jonvic Remulla نے میڈیا سے گفتگو کرتے ہوئے کہا کہ سینیٹر ڈیلا روزا کو گرفتار نہیں کیا جا رہا اور وہ محفوظ ہیں۔ انہوں نے کہا کہ ڈیلا روزا اپنے چیمبر میں موجود ہیں اور انہیں یقین دہانی کرائی گئی ہے کہ ان کے خلاف کسی فوری وارنٹ پر عملدرآمد نہیں ہوگا۔

وزیر داخلہ نے مزید بتایا کہ سینیٹ کی عمارت سے غیر ضروری عملے کو نکال دیا گیا ہے تاکہ صورتحال کو قابو میں رکھا جا سکے۔

یہ کشیدگی سابق فلپائنی صدر Rodrigo Duterte کے خلاف جاری بین الاقوامی فوجداری عدالت (ICC) کے مقدمات کے تناظر میں سامنے آئی ہے۔ آئی سی سی پہلے ہی ڈوٹرٹے کے خلاف انسانیت کے خلاف جرائم کے الزامات کی تصدیق کر چکی ہے، جن کا تعلق ان کی متنازع “منشیات کے خلاف جنگ” سے ہے۔

استغاثہ کے مطابق ڈوٹرٹے پر الزام ہے کہ انہوں نے اپنے دور اقتدار میں مبینہ طور پر ڈیتھ اسکواڈز کی سرپرستی کی اور ہزاروں افراد کے قتل میں مرکزی کردار ادا کیا۔ تاہم ڈوٹرٹے ان الزامات کی تردید کرتے رہے ہیں اور مؤقف اختیار کرتے ہیں کہ انہوں نے صرف قانون نافذ کرنے والے اداروں کو اپنے دفاع میں کارروائی کی ہدایت دی تھی۔

رپورٹس کے مطابق سینیٹر رونالڈ ڈیلا روزا، جو ڈوٹرٹے حکومت میں پولیس چیف رہ چکے ہیں، بھی انہی متنازع پالیسیوں کے باعث تحقیقات کی زد میں ہیں۔ ماہرین کا کہنا ہے کہ سینیٹ میں پیش آنے والا تازہ واقعہ فلپائن کی سیاست میں بڑھتی ہوئی کشیدگی اور طاقت کے مختلف مراکز کے درمیان تنازع کی عکاسی کرتا ہے۔