چین میں جاری ایشین جونیئر اسکواش چیمپئن شپ میں پاکستانی کھلاڑیوں نے عمدہ کھیل پیش کرتے ہوئے مختلف کیٹیگریز کے فائنلز کے لیے کوالیفائی کر لیا ہے، جس پر پاکستانی اسکواش حلقوں میں خوشی کی لہر دوڑ گئی ہے۔
بوائز انڈر 15 ایونٹ کے سیمی فائنل میں پاکستان کے باصلاحیت کھلاڑی احمر ریان خلیل نے ملائیشیا کے جولین لی ہاؤ کو شاندار مقابلے کے بعد شکست دے کر فائنل میں جگہ بنائی۔ احمر ریان نے پورے میچ میں جارحانہ اور متوازن کھیل کا مظاہرہ کیا۔
بوائز انڈر 17 کیٹیگری میں پاکستان کے نعمان خان نے ہم وطن کھلاڑی عمیر عارف کو شکست دے کر فائنل کے لیے کوالیفائی کیا۔ دونوں پاکستانی کھلاڑیوں کے درمیان دلچسپ مقابلہ دیکھنے کو ملا تاہم نعمان خان نے بہتر کارکردگی دکھاتے ہوئے کامیابی اپنے نام کی۔
دوسری جانب گرلز انڈر 15 ایونٹ میں پاکستان کی ماہ نور علی نے ہانگ کانگ کی حریف کھلاڑی کو شکست دے کر فائنل میں رسائی حاصل کر لی۔ ماہ نور علی کی اس کامیابی کو پاکستانی خواتین اسکواش کے لیے ایک اہم پیش رفت قرار دیا جا رہا ہے۔
About The Author
