فیفا ورلڈ کپ 2026 کے دوران جرمن قومی فٹبال ٹیم کی ایک ویڈیو سوشل میڈیا پر تیزی سے وائرل ہو رہی ہے، جس میں کھلاڑیوں کو آئیوری کوسٹ کے خلاف اہم میچ کے لیے ٹورنٹو روانگی سے قبل سخت سیکیورٹی اور امیگریشن مراحل سے گزرتے دیکھا جا سکتا ہے۔ ویڈیو کے منظر عام پر آنے کے بعد دنیا بھر میں شائقین فٹبال کے درمیان یہ بحث شروع ہو گئی ہے کہ آیا عالمی شہرت یافتہ کھلاڑیوں اور قومی ٹیموں کو خصوصی سہولیات دی جانی چاہئیں یا انہیں عام مسافروں کی طرح تمام قوانین کا سامنا کرنا چاہیے۔
رپورٹس کے مطابق جرمن ٹیم کے تمام ارکان کو ایئرپورٹ پر روایتی سیکیورٹی چیک، سامان کی مکمل جانچ، کسٹمز اسکریننگ اور دیگر امیگریشن مراحل سے گزرنا پڑا۔ حکام نے ٹیم کے لیے کسی قسم کی خصوصی رعایت یا علیحدہ پروٹوکول اختیار نہیں کیا بلکہ شمالی امریکہ میں نافذ سرحدی اور حفاظتی قوانین کے مطابق تمام کارروائیاں معمول کے مطابق انجام دی گئیں۔
اس تمام صورتحال میں جرمنی کے تجربہ کار گول کیپر مینوئل نوئر کی تصاویر اور تاثرات بھی سوشل میڈیا صارفین کی توجہ کا مرکز بن گئے۔ متعدد تصاویر اور ویڈیوز میں وہ طویل سیکیورٹی عمل کے دوران قدرے پریشان اور ناخوش دکھائی دیے، جس کے بعد مداحوں کی جانب سے مختلف تبصرے سامنے آئے۔
شائقین اور کھیلوں کے مبصرین کی جانب سے یہ سوال بھی اٹھایا جا رہا ہے کہ ورلڈ کپ جیسے عالمی ایونٹس میں شریک نامور کھلاڑیوں اور قومی ٹیموں کے لیے خصوصی سیکیورٹی راہداری یا تیز رفتار امیگریشن سہولیات فراہم کی جانی چاہئیں یا نہیں۔ تاہم متعلقہ حکام کا مؤقف ہے کہ سرحدی سلامتی اور ہوائی اڈوں کے حفاظتی ضوابط سب کے لیے یکساں ہیں اور کسی بھی قسم کی استثنا عالمی معیار کے خلاف ہوگی۔
About The Author
