چین نے امریکی پابندیوں کے جواب میں 10 امریکی فوجی اور دفاعی کمپنیوں پر نئی تجارتی پابندیاں عائد کرتے ہوئے ان کے لیے چین سے دوہرے استعمال (Dual-use) کی اشیاء کی برآمدات مکمل طور پر بند کرنے کا اعلان کر دیا ہے۔
چینی وزارت تجارت کی جانب سے جاری بیان میں کہا گیا ہے کہ یہ فیصلہ قومی سلامتی کے تحفظ اور امریکی حکومت کی جانب سے چینی کمپنیوں کو بلیک لسٹ کرنے کے حالیہ اقدامات کے ردعمل میں کیا گیا ہے۔
وزارت کے مطابق پابندیوں کا سامنا کرنے والی کمپنیوں میں فوجی ڈرونز تیار کرنے والے ادارے اور نایاب معدنیات کی کان کنی سے وابستہ کمپنیاں شامل ہیں۔ ان اداروں کو اب چین سے ایسی اشیاء کی فراہمی نہیں ہو سکے گی جو فوجی اور غیر فوجی دونوں مقاصد کے لیے استعمال کی جا سکتی ہیں۔
دوسری جانب چینی وزارت مالیات نے ایک علیحدہ اقدام کے تحت سرکاری اداروں کو 46 امریکی کمپنیوں سے مصنوعات خریدنے سے روک دیا ہے۔ اس فہرست میں Lockheed Martin، RTX Corporation اور General Dynamics کی متعدد ذیلی کمپنیاں بھی شامل ہیں۔
یہ پیش رفت ایسے وقت میں سامنے آئی ہے جب رواں ماہ کے آغاز میں امریکی محکمہ دفاع نے Alibaba Group اور Baidu سمیت کئی چینی ٹیکنالوجی کمپنیوں کو مبینہ طور پر چینی فوج سے روابط رکھنے کے الزام میں بلیک لسٹ کر دیا تھا، جس کے نتیجے میں ان کمپنیوں کو امریکی دفاعی معاہدوں میں شرکت سے روک دیا گیا تھا۔
بائیڈو نے امریکی الزامات کو مسترد کرتے ہوئے انہیں بے بنیاد قرار دیا تھا، جبکہ چینی وزارت تجارت نے اس وقت مؤقف اختیار کیا تھا کہ واشنگٹن کے اقدامات مئی میں Xi Jinping اور Donald Trump کے درمیان ہونے والے اتفاق رائے کے منافی ہیں۔
بیجنگ نے مزید واضح کیا ہے کہ تیسرے ممالک کی کمپنیوں یا افراد کو بھی ان پابندیوں کا شکار امریکی کمپنیوں کو چین سے دوہرے استعمال کی اشیاء منتقل کرنے کی اجازت نہیں ہوگی۔ تاہم بعض ناگزیر اشیاء کے لیے چینی کمپنیوں کو خصوصی برآمدی اجازت نامے کے حصول کی سہولت فراہم کی جائے گی۔
About The Author
