ریاض – خلیج تعاون کونسل (GCC) کے رکن ممالک نے خطے میں سیاحت کو فروغ دینے کے لیے متحدہ سیاحتی ویزے کے اجرا کی تمام تیاریاں مکمل کر لی ہیں۔ توقع ہے کہ اس ویزے کا اجراء رواں سال 2025 کی آخری سہ ماہی میں کر دیا جائے گا، جس سے خلیجی ممالک کے درمیان سیاحتی اور اقتصادی تعاون کا نیا دور شروع ہوگا۔
تفصیلات کے مطابق، اس نئے ویزے کو "جی سی سی گرینڈ ٹوور ویزا” کا نام دیا گیا ہے جو سیاحوں کو سعودی عرب، متحدہ عرب امارات، قطر، کویت، بحرین اور سلطنت عمان کے درمیان ایک ہی ویزے پر آزادانہ اور باآسانی سفر کی سہولت فراہم کرے گا۔
متحدہ عرب امارات کی وزارت معیشت و سیاحت کے مطابق، اس ویزے کے لیے ایک مشترکہ الیکٹرانک درخواست کے ذریعے اپلائی کیا جا سکے گا جو ایک یا ایک سے زیادہ ممالک میں داخلے کی اجازت فراہم کرے گی۔
"جی سی سی گرینڈ ٹوور ویزا” خلیجی خطے میں اقتصادی تنوع اور انضمام کے فروغ کے لیے ایک اہم سنگ میل ثابت ہوگا۔ اس منصوبے کا مقصد تیل پر انحصار کم کرنا، سیاحتی اخراجات میں اضافہ کرنا اور خطے میں سیاحوں کے قیام کے دورانیے کو بڑھانا ہے۔
اس کے تحت خلیجی ممالک کی معروف سیاحتی منزلوں کو ایک مربوط نقشے میں جوڑا جائے گا، جیسے:
-
عمان کے حسین ساحل
-
سعودی عرب کی روایتی مارکیٹیں
-
دبئی کی شاندار اسکائی لائن
-
قطر کے جدید میوزیمز
-
کویت کا کورنیچ
-
بحرین کے خوبصورت ساحل
یہ ویزا مکمل طور پر ڈیجیٹل عمل پر مبنی ہوگا، جس میں درخواست دہندہ آن لائن فارم جمع کرانے، ضروری دستاویزات اپ لوڈ کرنے اور ایک ہی پلیٹ فارم کے ذریعے فیس ادا کرنے کے قابل ہوگا۔
ویزے کی مدت 30 سے 90 دن کے درمیان ہوگی جس سے سیاحوں کو خطے کی دریافت میں زیادہ سہولت اور لچک حاصل ہوگی۔
ویزہ حاصل کرنے کے لیے بنیادی شرائط میں شامل ہیں:
-
درست پاسپورٹ
-
حالیہ ذاتی تصویر
-
ہوٹل بکنگ کی تصدیق
-
طبی انشورنس
-
واپسی کی ٹکٹ
-
مالی استطاعت کا ثبوت
خلیج تعاون کونسل کے حکام کا کہنا ہے کہ "جی سی سی گرینڈ ٹوور ویزا” خطے میں مشترکہ سکیورٹی، سیاحت اور اقتصادی ترقی کے لیے ایک انقلابی قدم ثابت ہوگا جو دنیا بھر کے سیاحوں کے لیے خلیجی خطے کو ایک پرکشش اور آسان سفر کی منزل بنا دے گا۔
