ایران نے نفسیاتی جنگ تیز کردی، ہزاروں اسرائیلیوں کو ذاتی معلومات کے ساتھ دھمکی آمیز ٹیکسٹ پیغامات موصول
بین الاقوامی ویب ڈیسک — ہزاروں اسرائیلی شہریوں کو ایسے دھمکی آمیز ٹیکسٹ پیغامات موصول ہوئے ہیں جن میں ان کی ذاتی معلومات شامل ہیں، جسے ایرانی ایجنٹوں کی جانب سے نفسیاتی جنگ کی تازہ ترین کوشش قرار دیا جا رہا ہے۔
انگریزی زبان میں بھیجے گئے پیغامات میں لکھا گیا ہے: "یہ آپ کے لیے اپنے آپ کو اور اپنے خاندان کو بچانے کا آخری موقع ہے۔ ہمارے شگریویت (سفارت خانے) آپ کے لیے کھلے ہیں۔ ہم آپ کو جانتے ہیں۔”
کچھ افراد کو ایسے لنکس بھی موصول ہوئے جن میں ان کا قومی شناختی نمبر اور دیگر ذاتی معلومات موجود تھیں، جس سے عوام میں شدید تشویش پائی جاتی ہے۔
اسرائیل کے نیشنل سائبر ڈائریکٹوریٹ نے عبرانی میڈیا کے حوالے سے جاری بیان میں ان پیغامات کو ڈرانے، سوشل انجینئرنگ اور نفسیاتی دباؤ پیدا کرنے کی منظم کوشش قرار دیا ہے۔
ادھر ایران سے منسلک ہیکنگ گروپ ہنڈالا نے دعویٰ کیا ہے کہ اس نے اسرائیل کی سابق وزیر آیلیٹ شیکڈ کے موبائل فون کو ہیک کر کے تقریباً 60 تصاویر اور ویڈیوز حاصل کی ہیں، جن میں سے بعض کو آن لائن شیئر بھی کیا گیا ہے۔
اسی گروپ نے گزشتہ ماہ یہ دعویٰ بھی کیا تھا کہ اس نے اسرائیلی وزیر اعظم بنجمن نیتن یاہو کے چیف آف اسٹاف زاچی برورمین اور سابق وزیر اعظم نفتالی بینیٹ کے موبائل فونز تک رسائی حاصل کی ہے۔
سیکیورٹی ذرائع کے مطابق ایران طویل عرصے سے مختلف حربوں کے ذریعے، بشمول مالی مراعات کی پیشکش، اسرائیلی شہریوں کو جاسوسی کے لیے بھرتی کرنے کی کوشش کرتا رہا ہے، اور حالیہ سائبر حملے اسی مہم کا تسلسل سمجھے جا رہے ہیں۔
اسرائیلی حکام نے عوام کو مشکوک پیغامات اور لنکس سے محتاط رہنے اور کسی بھی غیر مصدقہ رابطے پر فوری طور پر سائبر حکام کو اطلاع دینے کی ہدایت کی ہے۔
About The Author
