جنوبی لبنان میں اسرائیلی افواج کے انخلا کے بعد لبنانی فوج نے قصبہ زوطر الغربیہ میں تعیناتی شروع کر دی ہے۔ یہ پیش رفت امریکہ کی ثالثی میں طے پانے والے سیکیورٹی منصوبے کا پہلا عملی امتحان سمجھی جا رہی ہے، جس کا مقصد جنوبی لبنان میں ریاستی رٹ بحال کرنا اور علاقے کو غیر ریاستی مسلح عناصر سے پاک کرنا ہے۔
رائٹرز کے مطابق لبنانی سیکیورٹی کے ایک سینئر اہلکار نے بتایا کہ اسرائیلی فوج کے علاقے سے مرحلہ وار انخلا کے بعد لبنانی فوجی دستے قصبے میں داخل ہوئے، جہاں انجینئرنگ یونٹس نے بارودی مواد اور پھٹنے سے رہ جانے والے گولہ بارود کی تلاش اور صفائی کا عمل شروع کر دیا ہے۔
امریکی ثالثی میں ہونے والے اس منصوبے کے تحت لبنانی فوج جنوبی لبنان کے مخصوص علاقوں میں تعینات ہوگی، جبکہ اسرائیلی افواج مرحلہ وار انخلا کریں گی۔ اس منصوبے کا مقصد حزب اللہ کے زیر اثر علاقوں میں ریاستی کنٹرول کو مضبوط بنانا اور صرف لبنانی فوج کو مسلح اتھارٹی کے طور پر فعال رکھنا ہے۔
لبنانی فوج نے مقامی شہریوں سے اپیل کی ہے کہ وہ فی الحال زوطر الغربیہ واپس نہ آئیں اور سیکیورٹی اداروں کی ہدایات پر مکمل عمل کریں، کیونکہ علاقے کو محفوظ قرار دینے سے پہلے بارودی مواد کی مکمل صفائی ضروری ہے۔
About The Author
