کراچی – پاکستان کی ویمنز اے کرکٹ ٹیم ایشیا کپ رائزنگ اسٹارز ٹورنامنٹ میں شرکت کے لیے تھائی لینڈ روانہ ہوگئی ہے۔ ٹیم کراچی سے دبئی کے راستے بنکاک پہنچے گی جہاں ایونٹ کا انعقاد کیا جا رہا ہے۔
پاکستان ویمنز اے ٹیم اپنا پہلا میچ 13 فروری کو نیپال کے خلاف کھیلے گی۔ ٹورنامنٹ میں ایشیا کی ابھرتی ہوئی ٹیمیں شرکت کر رہی ہیں، جس کا مقصد نوجوان کھلاڑیوں کو بین الاقوامی سطح پر اپنی صلاحیتیں منوانے کا موقع فراہم کرنا ہے۔
ٹیم کی قیادت حفصہ خالد کریں گی، جبکہ اسکواڈ میں نوجوان اور باصلاحیت کھلاڑیوں کو شامل کیا گیا ہے تاکہ مستقبل کی قومی ٹیم کے لیے مضبوط بنیاد تیار کی جا سکے۔
ویمنز ایشیا کپ رائزنگ اسٹارز ٹورنامنٹ 13 فروری سے 22 فروری تک بنکاک میں کھیلا جائے گا۔ ایونٹ میں شریک ٹیمیں محدود اوورز کے فارمیٹ میں ایک دوسرے کے مدمقابل آئیں گی۔
پاکستان ویمنز اے ٹیم کی کارکردگی کو قومی کرکٹ کے مستقبل کے تناظر میں اہم قرار دیا جا رہا ہے، کیونکہ یہی کھلاڑی آئندہ برسوں میں سینئر ٹیم کی نمائندگی کر سکتی ہیں۔
About The Author
