خلیج تعاون کونسل (جی سی سی) نے ایران سے جنگی نقصانات کا مکمل معاوضہ ادا کرنے کا مطالبہ کردیا ہے۔ تنظیم نے اقوام متحدہ کی سلامتی کونسل سے ایران کو حملوں کا ذمہ دار ٹھہرانے پر بھی زور دیا ہے۔
جی سی سی کے سیکریٹری جنرل جاسم البدیوی نے جمعے کو سلامتی کونسل سے خطاب کیا۔ انہوں نے الزام عائد کیا کہ ایران نے خلیجی ممالک پر 7 ہزار سے زائد میزائل اور ڈرون حملے کیے۔
ان کے مطابق حملوں میں ہوائی اڈوں، بندرگاہوں اور توانائی کے مراکز کو نشانہ بنایا گیا۔ بجلی گھروں، پانی صاف کرنے والے پلانٹس اور رہائشی علاقوں کو بھی نقصان پہنچا۔
جاسم البدیوی نے کہا کہ ان حملوں سے جانی نقصان بھی ہوا۔ متعدد افراد زخمی ہوئے جبکہ بنیادی ڈھانچے کو شدید نقصان پہنچا۔
انہوں نے کہا کہ خلیجی ممالک اس جنگ کا حصہ نہیں تھے۔ ان کے بقول، ان ممالک نے کشیدگی کم کرنے کے لیے سفارتی کوششیں کیں۔
جی سی سی سیکریٹری جنرل نے ایران کو حملوں اور ان کے نتائج کا مکمل ذمہ دار قرار دیا۔ انہوں نے سلامتی کونسل سے متاثرہ ممالک کے نقصانات کا ازالہ یقینی بنانے کا مطالبہ کیا۔

