نئے صوبے کون بنائے گا

خالد جاوید خان

آج کل پاکستان میں نئے صوبوں کے قیام کے حوالے سے طرح طرح کی چہ میگوئیاں ہو رہی ہیں ۔کچھ حلقوں کا خیال ہے کہ نئے صوبوں کا قیام وقت کی اہم ترین ضرورت ہے ۔اس حوالے سے مختلف ممالک خصوصاً بھارت کا حوالہ دیا جاتا ہے جہاں تقسیم ہند کے وقت (برطانوی صوبوں کے لحاظ سے) 9 صوبے تھے اور اس کے علاوہ تقریباً 560 سے زائد نوابی و شاہی ریاستیں تھیں۔ آج بھارت میں کل28 صوبے اور مرکز کے زیر انتظام 8 یونین علاقے ہیں ۔جبکہ نوابی ریاستوں کو ختم کر کے بھارت میں ضم کر دیا گیا ہے۔ تقسیم ہند کے وقت پورے پاک و ہند کی آبادی صرف 35کروڑ تھی جبکہ آج صرف بھارت کی آبادی ڈیڑھ ارب ہے۔ جبکہ پاکستان آبادی کے لحاظ سے دنیا کا پانچواں بڑا ملک ہے جس کی آبادی تقریبا 27 کروڑ ہے اور بنگلہ دیش کی آبادی تقریبا 17 کروڑ ۔ گویا 1947 کا برصغیر جو صرف 35 کروڑ انسانوں پر مشتمل تھا آج تقریباً دو ارب نفوس پر پہنچ چکا ہے۔ اس ضمن میں یہ حقیقت بھی قابلِ ذکر ہے کہ پاکستان سے علیحدگی کے وقت بنگلہ دیش کی آبادی، جو اس وقت مشرقی پاکستان کہلاتا تھا، مغربی پاکستان سے جو آج کل پاکستان کہلاتا ہے تقریباً 80 لاکھ نفوس زیادہ تھی۔ جو7کروڑ کے قریب تھی جبکہ اس وقت کے مغربی پاکستان کی کل آبادی 6 کروڑ 18 لاکھ کے پاس پاس تھی۔ گویا بنگلہ دیش نے اپنے قیام کے بعد جو قابلِ رشک ترقی کی ہے اس کی وجہ آبادی میں اضافے کی شرح کو کنٹرول کرنا بھی شامل ہے۔ پاکستان میں معاشی اور معاشرتی تنزلی کی ایک بڑی وجہ آبادی میں خوفناک اضافہ بھی ہے جس کی شرح ہمارے خطے میں سب سے زیادہ ہے۔ اس ضمن میں اس حقیقت سے انکار نہیں کیا جا سکتا کہ جہاں ہم آبادی میں تیز رفتار اضافے کو روکنے میں ناکام رہے ہیں، وہیں بڑھتی ہوئی آبادی کے تناسب سے ہم نے انتظامی اصلاحات کرنے میں بھی بہت دیر کر دی ہے اور اسکی سب سے بڑی وجہ ملک میں گزشتہ 50سال سے جاری سیاسی عدم استحکام ہے۔ جناب ذوالفقار علی بھٹو کی حکومت کے بعد ملک مسلسل سیاسی عدم استحکام اور طرح طرح کے سیاسی تجربات کی لیبارٹری بنا ہوا ہے۔ جناب بھٹو کے پانچ سالہ دور میں پہلی اور آخری مرتبہ بنیادی نوعیت کے فیصلے ہوئے جن میں سب سے بڑا کام 1973ءکے متفقہ آئین کی تیاری اور اس کا نفاذ تھا، یہ آئین اتنا بھرپور ہے کہ اگر اس پر عمل کیا جاتا تو پاکستان آج جن مسائل سے دوچار ہے۔ ایسا نہ ہوتا۔ اسی آئین میں نئے صوبوں کا آئینی طریقہ کار بھی نہایت وضاحت سے دیا گیا ہے لیکن دکھ کی بات تو یہ ہے کہ اس آئین کی موجودگی کے باوجود اس پر کبھی عمل نہیں کیا گیا۔

اس وقت سوال یہ نہیں کہ پاکستان کو اپنی بڑھتی ہوئی آبادی کے پیش نظر نئے صوبوں یا انتظامی یونٹوں کی ضرورت ہے یا نہیں سوال یہ ہے کہ یہ کام کون کرے گا؟آبادی کے مطابق انتظامی یونٹ کا قیام کس طرح عمل میں لایا جائے گا کیا یہ سیاسی جماعتوں، دانشوروں اور سول سوسائٹی کو اعتماد میں لے کر کیا جائے گا اور اس کا مقصد واقعی انتظامی معاملات کو بہتر بنانا اور گڈ گورننس ہوگا یا اس میں کسی طبقے کی بالادستی مقصود ہوگی۔ جیسے 1955ءمیں ون یونٹ کی آڑ میں بنگالیوں کی عوامی برتری کا توڑ نکالنا مقصود تھا ۔ جو اس وقت پاکستان کی کل آبادی کا 54فیصد تھے ۔ قیام پاکستان کے وقت دستور ساز اسمبلی کے کل 69اراکین میں سے 44یعنی 60فیصد سے زائد کا تعلق بنگال سے تھاایسے میں کوئی بھی قانون اور دستور سازی بنگالی اراکین کی مرضی کے بغیر ممکن نہیں تھی ۔پاکستان کی اشرافیہ کسی طور پر بنگالیوں کو ان کے جائز اور جمہوری حقوق دینے کو تیار نہیں تھی۔