نئے مالی سال 26-2025 کو شروع ہوئے ابھی چوتھا دن ہی ہے کہ حکومت نے آئی ایم ایف کی ایک اور شرط پوری کر دی۔ گریڈ 17 تک کے سرکاری ملازمین کے اثاثوں کو پبلک کرنے کا نوٹی فکیشن جاری کر دیا گیا۔ اس سے پہلے حکومت نے یوٹیلیٹی سٹورز کو 10 جولائی تک بند کرنے اور ملازمین کو فارغ کرنے کا نوٹی فکیشن جاری کیا تھا۔
صدر مملکت آصف علی زرداری کی منظوری سے سول سرونٹس ترمیمی ایکٹ 2025 کا گزٹ نوٹی فکیشن جاری کر دیا گیا، اسٹیبلشمنٹ ڈویژن نےگزٹ نوٹی فکیشن تمام وفاقی وزارتوں اور ڈویژنز کو بھجوا دیا۔
نوٹیفکیشن کے سول سرونٹس ایکٹ 1973 میں سیکشن 15 کے بعد 15 (اے) کا اضافہ کر دیا گیا۔
نوٹی فکیشن میں کہا گیا ہے کہ سرکاری افسران کےاثاثوں کی تفصیلات فیڈرل بورڈ آف ریونیو (ایف بی آر) کے ذریعے پبلک کی جائیں گی، سرکاری افسران کو اپنےاہل خانہ کے اثاثوں کی تفصیلات بھی جمع کرانا ہوں گی۔
نوٹی فکیشن کے مطابق سرکاری افسران ملکی اور غیر ملکی اثاثوں اور مالی حیثیت سے آگاہ کریں گے، سرکاری افسران کو اپنےاو رپنے اہل خانہ کے اثاثے ڈیجیٹل طور پر فائل کرنا ہوں گے، کسی بھی افسرکی ذاتی معلومات کی راز داری کاخیال رکھا جائے گا۔
