واشنگٹن: امریکا میں سعودی سفیر شہزادی ریما بنت بندر بن سلطان بن عبد العزیز نے کہا ہے کہ سعودی ولی عہد و وزیر اعظم شہزادہ محمد بن سلمان بن عبدالعزیز کا دورہ امریکا دونوں ممالک کے تعلقات کے لیے اہم سنگِ میل کی حیثیت رکھتا ہے۔
سفیر نے کہا کہ یہ دورہ دونوں ممالک کے درمیان سٹریٹجک تعاون کے نئے اور وسیع افق کھولے گا۔ انہوں نے ولی عہد کا خیرمقدم کرتے ہوئے بتایا کہ یہ تاریخی دورہ سعودی عرب اور امریکا کے درمیان گہری شراکت داری کا مظہر ہے اور اس بات کا ثبوت ہے کہ دونوں ممالک کی قیادتیں باہمی مفادات کو مضبوط بنانے اور سیاسی، اقتصادی اور سکیورٹی تعاون کے نئے مرحلے کی جانب پیش قدمی کے لیے پُرعزم ہیں، جس سے علاقائی اور عالمی استحکام کو تقویت ملے گی۔
شہزادی ریما بنت بندر نے کہا کہ وہ اپنی جانب سے اور امریکا میں موجود پوری سفارتی ٹیم کی جانب سے ولی عہد کا خیرمقدم کرتی ہیں، اور یہ دورہ بے حد اہم ہے۔ انہوں نے توقع ظاہر کی کہ یہ دورہ دونوں دوست ممالک کے عوام کی خواہشات کے مطابق، دو طرفہ تعلقات کو مزید موثر اور وسیع تر سطح تک لے جائے گا۔
