پاکستان ٹیم کے آل راونڈر سلمان علی آغا نے کہا ہے کہ پاکستان ٹیم پانچویں روز بنگلہ دیش کو جلد از جلد آؤٹ کرنے کی کوشش کرے گی اور پھر جو بھی ہدف ملا اسے حاصل کرنے کی بھرپور کوشش کی جائے گی۔
ڈھاکا میں جاری پاکستان بمقابلہ بنگلہ دیش پہلا ٹیسٹ کے چوتھے روز کھیل کے اختتام پر پریس کانفرنس کرتے ہوئے سلمان علی آغا نے کہا کہ اس وقت یہ کہنا مشکل ہے کہ میچ میں کس ٹیم کو برتری حاصل ہے، کیونکہ پانچواں روز انتہائی دلچسپ ہو سکتا ہے۔
انہوں نے کہا کہ اگر بنگلہ دیش جارحانہ حکمت عملی اپناتے ہوئے 60 سے 70 اوورز میں تقریباً 260 رنز کا ہدف دیتا ہے تو پاکستان جیت کے لیے ضرور جائے گا، تاہم انہیں نہیں لگتا کہ میزبان ٹیم ایسا رسک لے گی۔
سلمان علی آغا کا کہنا تھا کہ ان کی ذاتی خواہش یہی ہو گی کہ پاکستان کو ایسا ہدف ملے جس کا تعاقب ممکن ہو، لیکن موجودہ صورتحال میں ایسا دکھائی نہیں دیتا۔
انہوں نے مزید کہا کہ دوسرے روز پاکستان نے عمدہ کھیل پیش کیا، بولرز نے جلد وکٹیں حاصل کیں جبکہ بیٹرز نے بھی ذمہ دارانہ بیٹنگ کی۔ ان کے مطابق پہلے دن پاکستان واضح برتری حاصل نہیں کر سکا تھا جبکہ تیسرے روز کا کھیل ملا جلا رہا۔
پاکستانی آل راؤنڈر نے کہا کہ ٹیسٹ کرکٹ میں ہر ٹیم کی پہلی ترجیح فتح ہوتی ہے، تاہم اگر محدود اوورز میں بڑا ہدف ملے تو اسے حاصل کرنا آسان نہیں ہوتا۔
سلمان علی آغا نے فاسٹ بولرز کی کارکردگی کو بھی سراہتے ہوئے کہا کہ ٹیم یہی چاہے گی کہ بنگلہ دیش کو جلد پویلین واپس بھیجا جائے، جبکہ میزبان ٹیم کی حکمت عملی کے بارے میں وہی بہتر جانتے ہیں۔
انہوں نے کہا کہ ورلڈ ٹیسٹ چیمپئن شپ کے آغاز کے بعد ٹیمیں اب ڈرا کے بجائے جیت کے لیے کھیلتی ہیں، اسی لیے ایسی پچز تیار کی جاتی ہیں جن سے نتیجہ نکل سکے۔
About The Author
