فیفا ورلڈ کپ 2026 کے آغاز کے موقع پر کراچی میں فٹبال شائقین کے لیے خصوصی انتظامات کیے گئے ہیں، جہاں مختلف علاقوں میں بڑی اسکرینیں نصب کر کے عالمی کپ کے میچز براہِ راست دکھانے کا اہتمام کیا گیا ہے۔
اطلاعات کے مطابق لیاری میں واقع عالمی فٹبال اسٹیڈیم میں فٹبال کے مداحوں کے لیے ایک دیو ہیکل اسکرین نصب کی گئی ہے، جہاں افتتاحی تقریب، تمام میچز اور اختتامی تقریب براہِ راست نشر کی جائے گی۔
اس کے علاوہ کراچی کے مختلف علاقوں، جن میں صدیق گوٹھ ملیر، کلری، علی محمد محلہ اور سیفی لین شامل ہیں، وہاں بھی بڑی اسکرینوں کے ذریعے شائقین کو ورلڈ کپ کے مقابلے دیکھنے کا موقع فراہم کیا جا رہا ہے۔
دریں اثنا بلاول بھٹو زرداری نے اپنے ویڈیو پیغام میں فیفا ورلڈ کپ 2026 کے انعقاد پر خوشی کا اظہار کرتے ہوئے فٹبال شائقین کو لیاری کے انٹرنیشنل فٹبال اسٹیڈیم میں آ کر بڑی اسکرین پر میچز دیکھنے کی دعوت دی۔
انہوں نے کہا کہ پاکستان پیپلزپارٹی کی جانب سے لیاری میں فٹبال کے شائقین کے لیے خصوصی انتظامات کیے گئے ہیں تاکہ وہ عالمی کپ کے سنسنی خیز مقابلوں سے لطف اندوز ہو سکیں۔
بلاول بھٹو زرداری کا کہنا تھا کہ لیاری فٹبال کا گڑھ سمجھا جاتا ہے اور یہاں کے نوجوانوں میں اس کھیل کے لیے غیر معمولی جذبہ پایا جاتا ہے، اسی جذبے کو مدنظر رکھتے ہوئے عالمی کپ کے میچز اجتماعی طور پر دیکھنے کا انتظام کیا گیا ہے۔
فیفا ورلڈ کپ 2026 کے آغاز کے ساتھ ہی کراچی سمیت ملک بھر میں فٹبال شائقین کا جوش و خروش عروج پر ہے، جبکہ لیاری میں اس ایونٹ کو ایک بڑے عوامی جشن کی شکل دی جا رہی ہے۔
About The Author
