چین میں سیلاب کی صورتحال شدید بارشوں کے بعد مزید سنگین ہو گئی ہے، جس کے باعث 1 لاکھ 15 ہزار سے زائد افراد کو خطرناک علاقوں سے نکال کر محفوظ مقامات پر منتقل کر دیا گیا ہے۔
گلوبل ٹائمز نے چائنا سنٹرل ٹیلی ویژن (CCTV) اور صوبائی حکام کے حوالے سے رپورٹ کیا ہے کہ مجموعی طور پر 49 ہزار 925 گھرانوں کے 115 ہزار 756 افراد کو شدید موسم کے تازہ ترین اسپیل کے دوران محفوظ مقامات پر منتقل کیا گیا۔
رپورٹ کے مطابق شمالی شانشی، مغربی گوانژونگ اور جنوب مغربی شانسی کے بیشتر علاقوں میں پیر اور منگل کی درمیانی شب ہلکی سے درمیانی بارش ہوئی، جبکہ کئی علاقوں میں موسلا دھار بارش ریکارڈ کی گئی۔
حکام کے مطابق لوونان، ٹونگوان اور بائہی کاؤنٹیاں سب سے زیادہ متاثر ہونے والے علاقوں میں شامل ہیں۔
سرکاری اعداد و شمار کے مطابق لوونان کے شپو اسٹیشن پر سب سے زیادہ 136.4 ملی میٹر (5.3 انچ) بارش ریکارڈ کی گئی، جس کے باعث نشیبی علاقوں میں پانی جمع ہونے اور سیلابی صورتحال پیدا ہونے کے واقعات سامنے آئے۔
شدید بارشوں کے باعث ہانجیانگ، ویہی، ڈانجیانگ اور ییلو دریاؤں میں پانی کی سطح خطرناک حد تک بلند ہو گئی۔
حکام کے مطابق 28 دریاؤں اور 40 ہائیڈرولوجیکل اسٹیشنوں پر مجموعی طور پر 47 سیلابی واقعات ریکارڈ کیے گئے، جبکہ متعلقہ ادارے صورتحال کی مسلسل نگرانی کر رہے ہیں۔
About The Author
