واشنگٹن – امریکا اور روس کے درمیان جوہری ہتھیاروں کی تعداد محدود کرنے والا آخری بڑا معاہدہ نیو اسٹارٹ (New START) جمعرات کو ختم ہو رہا ہے، جس کے بعد دنیا میں جوہری اسلحے پر کوئی مؤثر عالمی پابندی کا معاہدہ باقی نہیں رہے گا۔
نیو اسٹارٹ معاہدہ 2010 میں طے پایا تھا، جس کے تحت دونوں ممالک کو جوہری وارہیڈز اور بین البراعظمی بیلسٹک میزائلوں (ICBMs) کی تعداد ایک مقررہ حد میں رکھنے کا پابند بنایا گیا تھا۔ یہ معاہدہ سرد جنگ کے بعد جوہری اسلحہ کنٹرول کے سلسلے کی آخری اہم کڑی سمجھا جاتا تھا۔
گزشتہ برس ستمبر میں روسی صدر ولادیمیر پیوٹن نے معاہدے میں ایک سال کی توسیع کی تجویز دی تھی، جس پر امریکی صدر ڈونلڈ ٹرمپ نے ابتدائی طور پر مثبت ردِعمل ظاہر کیا، تاہم بعد ازاں اس حوالے سے کوئی باضابطہ پیش رفت نہ ہو سکی۔
روسی رہنما دمتری میدویدیف کے مطابق ماسکو کو تاحال امریکا کی جانب سے نیو اسٹارٹ پر کوئی سنجیدہ یا واضح جواب موصول نہیں ہوا، حالانکہ روس نے مذاکرات کے لیے وقت فراہم کیا تھا۔
ادھر امریکی حکام کا کہنا ہے کہ صدر ٹرمپ جوہری ہتھیاروں کی حد بندی کے کسی بھی نئے معاہدے میں چین کو بھی شامل کرنے کے خواہاں ہیں۔ وائٹ ہاؤس کے ایک اعلیٰ اہلکار کے مطابق صدر اس معاملے پر مناسب وقت پر اپنا مؤقف واضح کریں گے۔
اسلحہ کنٹرول کے ماہرین کے مطابق نیو اسٹارٹ کی توسیع ایک نسبتاً سادہ سیاسی فیصلہ ہو سکتا تھا، تاہم امریکی انتظامیہ کے اندرونی طریقہ کار اور سفارتی عمل کی سست روی کے باعث یہ موقع ضائع ہو گیا۔
ماہرین نے خبردار کیا ہے کہ معاہدے کے خاتمے سے امریکا اور روس کے درمیان جوہری ہتھیاروں کی نئی دوڑ شروع ہونے کا خطرہ بڑھ گیا ہے۔ اسی خدشے کے پیشِ نظر دنیا کو تباہی کے قریب ظاہر کرنے والی علامتی ڈومز ڈے کلاک کو بھی آدھی رات کے مزید قریب کر دیا گیا ہے۔
واضح رہے کہ روس نے 2023 میں ہی نیو اسٹارٹ کے تحت جوہری تنصیبات کے معائنے کی اجازت معطل کر دی تھی، جبکہ صدر ٹرمپ ماضی میں امریکا میں دوبارہ جوہری تجربات شروع کرنے کے امکان کا بھی اظہار کر چکے ہیں۔
About The Author
