انٹرنیشنل کرکٹ کونسل (آئی سی سی) ویمنز ایمرجنگ نیشنز ٹرافی میں پاکستان نے تھائی لینڈ کو 24 رنز سے شکست دے دی۔
عجمان میں جاری ایونٹ میں پاکستانی ٹیم نے اپنے دوسرے میچ میں پہلے بیٹنگ کی۔ گرین شرٹس نے مقررہ اوورز میں دو وکٹوں کے نقصان پر 180 رنز بنائے۔
پاکستان کی جانب سے عائشہ ظفر نے شاندار بیٹنگ کی۔ انہوں نے 59 رنز کی ناقابل شکست اننگز کھیلی۔
شوال ذوالفقار نے 42 رنز بنائے۔ اس کے علاوہ منیبہ علی اور صدف شمس نے 37، 37 رنز کی اننگز کھیلیں۔
پاکستان کے 180 رنز کے جواب میں تھائی لینڈ کی ٹیم مقررہ اوورز میں آٹھ وکٹوں پر 156 رنز بنا سکی۔ یوں پاکستان نے یہ مقابلہ 24 رنز سے اپنے نام کرلیا۔
پاکستان کی جانب سے تسمیہ رباب نے عمدہ بولنگ کا مظاہرہ کیا۔ انہوں نے تھائی لینڈ کی چار کھلاڑیوں کو آؤٹ کیا۔
میچ میں بہترین کارکردگی پر عائشہ ظفر کو پلیئر آف دی میچ قرار دیا گیا۔
