پاکستان مینز اسکواش ٹیم نے 23ویں ایشین ٹیم اسکواش چیمپئن شپ 2026ء میں فاتحانہ آغاز کیا ہے۔ پہلے میچ میں پاکستان نے ازبکستان کو 3-0 سے شکست دے دی۔
پاکستان کی جانب سے نور زمان، محمد عاصم خان اور ناصر اقبال نے کامیابیاں حاصل کیں۔ تینوں کھلاڑیوں نے اپنے اپنے میچ جیت کر ٹیم کو کلین سوئپ کامیابی دلائی۔
چیمپئن شپ کے پہلے روز نور زمان نے پہلا میچ کھیلا۔ انہوں نے ازبکستان کے محمد مصطفیٰ عبدالرحمانوف کو ہرایا۔ نور زمان نے 11-2، 11-2 اور 11-4 سے کامیابی حاصل کی۔
دوسرے میچ میں محمد عاصم خان نے میدان مارا۔ انہوں نے یخیوخون نذیروف کو 11-3، 11-4 اور 11-2 سے شکست دی۔
اسی طرح تیسرے میچ میں ناصر اقبال نے پاکستان کی برتری مکمل کردی۔ انہوں نے بوترجون انورجونوف کو 11-6، 11-5 اور 11-6 سے ہرایا۔
اس طرح پاکستان نے ازبکستان کے خلاف تینوں میچ جیت لیے۔
ایونٹ کے پہلے روز دیگر ٹیموں کے درمیان بھی دلچسپ مقابلے ہوئے۔ مینز مقابلوں میں ہانگ کانگ چین نے ایران کو 3-0 سے شکست دی۔
ویمنز مقابلوں میں ہانگ کانگ نے کوریا کو 2-1 سے ہرایا۔ جبکہ ملائیشیا نے ایران کے خلاف 3-0 سے کامیابی حاصل کی۔
