ڈائریکٹر جنرل پلاک محمد اسلم شاہد نے اجوکا تھیٹر کی پنجابی فلم ‘بالی جٹی’ کی تقریب میں شرکت کی۔
واضح رہے کہ اجوکا تھیٹر نے فلمی دنیا میں قدم رکھتے ہوئے پنجابی لوک تھیٹر کی عظیم فنکارہ بالی جٹی (عنایت بی بی) کی زندگی اور جدوجہد پر پنجابی فیچر فلم بنانے کا اعلان کیا ہے۔
فلم کی کہانی،سکرپٹ اور تحقیق اجوکا تھیٹر کے بانی شاہد ندیم نے لکھی ہے اور ہدایت کاری بھی انہی کے ذمے ہے۔
فلم میں 1970ء کے پنجاب کی ثقافت، لوک موسیقی اور تھیٹر کے سنہرے دور کو پیش کیا جائے گا۔
بالی جٹی 1937ء میں ساہیوال میں پیدا ہوئیں اور 1958ء میں لوک تھیٹر سے اپنے فنی سفر کا آغاز کیا۔ ہیر رانجھا، سسی پنوں، سوہنی مہینوال اور مرزا صاحباں جیسے ڈراموں میں اداکاری اور گائیکی سے شہرت حاصل کی،اپنی گرج دار آواز کی وجہ سے انہیں "ببر شیرنی” کا خطاب دیا گیا۔
8 جون 1996ء کو وہ اس جہانِ فانی سے رخصت ہو گئیں۔ یہ فلم پنجاب کی لوک ثقافت اور تھیٹر کی تاریخ میں ان کی لازوال خدمات کو خراجِ تحسین پیش کرنے کی ایک اہم کوشش ہے۔
