فیفا ورلڈ کپ 2026 میں استعمال ہونے والی آفیشل میچ بال ’ٹرائی اونڈا‘ اپنی جدید ٹیکنالوجی اور پاکستانی تیاری کے باعث عالمی توجہ کا مرکز بن گئی ہے۔ جدید سینسرز سے مزین اس فٹبال کو ہر میچ سے قبل چارج کرنا ضروری ہوگا تاکہ کھیل کے دوران درست اور فوری ڈیٹا فراہم کیا جا سکے۔
جرمن اسپورٹس کمپنی Adidas کی ڈیزائن کردہ یہ آفیشل فٹبال پاکستان کے شہر Sialkot میں قائم Future Sport تیار کر رہی ہے، جو اس سے قبل بھی 2014، 2018 اور 2022 کے فیفا ورلڈ کپ کے لیے فٹبالز تیار کر چکی ہے۔
اس گیند میں نصب خصوصی سینسر کھیل کے دوران اس کی رفتار، سمت، مقام اور کھلاڑیوں کے ساتھ ہونے والے ہر رابطے کا ریکارڈ حقیقی وقت میں محفوظ کرے گا۔ یہ نظام اسٹیڈیم میں نصب 12 جدید کیمروں کے ساتھ مربوط ہوگا جو فی سیکنڈ 50 مرتبہ ڈیٹا جمع کریں گے۔
ماہرین کے مطابق حاصل ہونے والا ڈیٹا ویڈیو اسسٹنٹ ریفری (VAR) کو آف سائیڈ، گول لائن اور دیگر اہم فیصلوں میں زیادہ درستگی فراہم کرے گا، جس سے متنازع فیصلوں میں نمایاں کمی متوقع ہے۔
رپورٹس کے مطابق 2022 کے ورلڈ کپ میں استعمال ہونے والی گیند کے برعکس اس بار سینسر کو براہِ راست گیند کے ایک پینل کے اندر نصب کیا گیا ہے۔ اس کے باوجود گیند کے وزن اور توازن کو تقریباً برقرار رکھا گیا ہے، جس کی وجہ سے کھلاڑی کھیل کے دوران سینسر کی موجودگی محسوس نہیں کر سکیں گے۔
’ٹرائی اونڈا‘ نام دو الفاظ سے مل کر بنایا گیا ہے۔ ’’ٹرائی‘‘ سے مراد تین جبکہ ہسپانوی لفظ ’’اونڈا‘‘ کا مطلب لہر ہے۔ گیند کے ڈیزائن میں سرخ، نیلا اور سبز رنگ نمایاں ہیں جبکہ تینوں میزبان ممالک کی نمائندگی کے لیے خصوصی علامتیں شامل کی گئی ہیں۔
کینیڈا کی نمائندگی میپل کے پتوں، میکسیکو کی نمائندگی عقاب اور امریکا کی نمائندگی ستاروں کے ذریعے کی گئی ہے، جبکہ مجموعی ڈیزائن اتحاد، شراکت داری اور عالمی فٹبال کے جذبے کی عکاسی کرتا ہے۔
About The Author
