کابل – افغانستان کے دارالحکومت کابل میں ایک زور دار دھماکے کے نتیجے میں کم از کم 7 افراد جاں بحق جبکہ 20 زخمی ہو گئے۔ دھماکا شہر کے انتہائی حساس اور محفوظ تصور کیے جانے والے علاقے شہرنو (شاہراہ نو) میں ایک ہوٹل اور ریسٹورنٹ کے قریب پیش آیا، جہاں غیر ملکی سفارت خانے، شاپنگ کمپلیکس اور بڑے دفاتر واقع ہیں۔
غیر ملکی خبر رساں اداروں کے مطابق دھماکے میں زخمی ہونے والوں میں چار خواتین اور ایک بچہ بھی شامل ہے، جنہیں فوری طور پر قریبی اسپتال منتقل کر دیا گیا۔ دھماکے کے باعث علاقے میں شدید خوف و ہراس پھیل گیا اور اطراف کی عمارتوں کو بھی نقصان پہنچا۔
افغان وزارتِ داخلہ کے ترجمان عبدالمتین قانی نے خبر رساں ادارے رائٹرز کو بتایا کہ دھماکے کی نوعیت اور اسباب جاننے کے لیے تحقیقات شروع کر دی گئی ہیں۔ ان کا کہنا تھا کہ واقعے سے متعلق حتمی تفصیلات اور ذمہ داروں کے بارے میں معلومات تحقیقات مکمل ہونے کے بعد جاری کی جائیں گی۔
دوسری جانب فرانسیسی خبر رساں ایجنسی اے ایف پی کے مطابق ابتدائی اطلاعات سے ظاہر ہوتا ہے کہ دھماکا ایک ریسٹورنٹ کے اندر یا اس کے قریب ہوا، جس کے باعث بڑی تعداد میں شہری متاثر ہوئے۔ دھماکے کے فوراً بعد پولیس اور امدادی ٹیمیں موقع پر پہنچ گئیں، جبکہ علاقے کو گھیرے میں لے کر سیکیورٹی مزید سخت کر دی گئی۔
شہرنو کا علاقہ غیر ملکیوں کی رہائش اور سفارتی سرگرمیوں کے باعث کابل کے نسبتاً محفوظ ترین علاقوں میں شمار کیا جاتا ہے، جس کے باعث اس دھماکے نے سیکیورٹی انتظامات پر بھی سوالات کھڑے کر دیے ہیں۔
افغان حکام کا کہنا ہے کہ حملے کے ذمہ دار عناصر کی شناخت کے لیے تمام پہلوؤں سے تحقیقات کی جا رہی ہیں اور شہریوں کے تحفظ کو یقینی بنانے کے لیے سیکیورٹی اقدامات مزید سخت کر دیے گئے ہیں۔
About The Author
