نئی دہلی: بھارتی کانگریس کے سینئر رہنما راہول گاندھی اور ان کی والدہ سونیا گاندھی کے خلاف نیشنل ہیرالڈ منی لانڈرنگ کیس میں مجرمانہ سازش کے الزامات کے تحت ایف آئی آر درج کی گئی ہے۔ دہلی پولیس کی اکنامک آفینسز ونگ (ای او ڈبلیو) نے نئی ایف آئی آر میں دونوں رہنماؤں سمیت کل 6 افراد کو نامزد کیا ہے۔
ایف آئی آر میں سام پٹروڈا (Sam Pitroda) اور تین دیگر افراد کے نام شامل ہیں جبکہ تین کمپنیوں ایسوسی ایٹڈ جرنلز لمیٹڈ (AJL)، ینگ انڈین اور ڈوٹیکس مرچنڈائز پرائیویٹ لمیٹڈ کو بھی الزامات کی زد میں لایا گیا ہے۔ ملزمان پر الزام ہے کہ انہوں نے ایسوسی ایٹڈ جرنلز لمیٹڈ پر دھوکہ دہی کے ذریعے قبضہ کرنے کی مجرمانہ سازش کی۔ یہ کمپنی وہی ہے جس کے زیر انتظام کبھی نیشنل ہیرالڈ اخبار شائع ہوتا تھا۔
رپورٹ کے مطابق کولکتہ کی مبینہ شیل کمپنی ڈوٹیکس مرچنڈائز نے ینگ انڈین کو ایک کروڑ روپے فراہم کیے، جس کے بعد ینگ انڈین نے 50 لاکھ روپے کانگریس کو ادا کیے اور اے جے ایل پر کنٹرول حاصل کیا۔ اس وقت اے جے ایل کے اثاثوں کی مالیت تقریباً 2000 کروڑ روپے تھی۔
ایف آئی آر 3 اکتوبر کو انفورسمنٹ ڈائریکٹوریٹ (ED) کی شکایت کی بنیاد پر درج کی گئی، جس نے اپنی تحقیقاتی رپورٹ دہلی پولیس کے حوالے کی تھی۔
واضح رہے کہ گزشتہ روز دہلی کی عدالت نے نیشنل ہیرالڈ کیس کے فیصلے کا اعلان 16 دسمبر تک مؤخر کر دیا تھا۔
