نیپالی شیرپا گائیڈ کامی ریٹا نے ایک بار پھر تاریخ رقم کرتے ہوئے دنیا کی بلند ترین چوٹی ماؤنٹ ایورسٹ کو ریکارڈ 32ویں مرتبہ سر کر لیا۔
غیر ملکی خبر رساں ادارے رائٹرز کے مطابق 56 سالہ نیپالی شیرپا گائیڈ کامی ریٹا اتوار کی صبح مقامی وقت کے مطابق 10 بج کر 12 منٹ پر 8 ہزار 849 میٹر بلند چوٹی پر پہنچے۔ وہ 14 Peaks Expedition کمپنی کے غیر ملکی کوہ پیماؤں کی رہنمائی کر رہے تھے۔
Nepal Department of Tourism نے کامی ریٹا شیرپا کو اس تاریخی سنگِ میل پر مبارکباد دیتے ہوئے کہا کہ ان کی کامیابی نے نیپال کی پہاڑی سیاحت کو عالمی سطح پر مزید فروغ دیا ہے۔
کامی ریٹا نے پہلی مرتبہ 1994 میں ماؤنٹ ایورسٹ سر کیا تھا اور اس کے بعد وہ تقریباً ہر سال یہ کارنامہ دہراتے رہے ہیں۔ 2014، 2015 اور 2020 میں مختلف وجوہات کے باعث ایورسٹ مہمات محدود یا معطل رہیں۔ بعض برسوں میں انہوں نے ایک ہی سال میں دو مرتبہ بھی ایورسٹ سر کیا۔
رپورٹ کے مطابق ایک اور نیپالی شیرپا خاتون Lhakpa Sherpa نے بھی 11ویں بار ایورسٹ سر کر کے خواتین میں سب سے زیادہ بار چوٹی سر کرنے کا اپنا ریکارڈ مزید بہتر بنا لیا۔
کامی ریٹا نیپال کے ضلع سولکھمبو کے علاقے تھامے سے تعلق رکھتے ہیں، جو معروف کوہ پیما Tenzing Norgay کا بھی آبائی علاقہ ہے۔ ٹینزنگ نورگے نے Edmund Hillary کے ہمراہ 1953 میں پہلی بار ماؤنٹ ایورسٹ سر کیا تھا۔
اعداد و شمار کے مطابق اب تک 8 ہزار سے زائد افراد ماؤنٹ ایورسٹ سر کر چکے ہیں، جن میں کئی کوہ پیما متعدد بار یہ کارنامہ انجام دے چکے ہیں۔ غیر شیرپا کوہ پیماؤں میں برطانوی گائیڈ Kenton Cool 19 بار ایورسٹ سر کر کے سرفہرست ہیں۔
نیپال حکومت نے رواں سیزن میں مارچ سے مئی کے دوران 492 غیر ملکی کوہ پیماؤں کو ایورسٹ سر کرنے کے اجازت نامے جاری کیے ہیں، تاہم اس سیزن میں اب تک تین نیپالی کوہ پیما جان کی بازی بھی ہار چکے ہیں
About The Author
