ابوجا/نئی دہلی – نائیجیریا کی ڈرگ انفورسمنٹ ایجنسی نے لاگوس کی مرکزی بندرگاہ پر ایک تجارتی جہاز سے 31.5 کلو کوکین برآمد کر کے جہاز کے بھارتی عملے کے 22 ارکان کو گرفتار کر لیا ہے۔
بھارتی میڈیا کے مطابق یہ کارروائی ایم وی آروانا ہولیا جہاز کی تلاشی کے دوران عمل میں آئی۔ جہاز مارشل آئی لینڈز سے روانہ ہوا تھا۔ گرفتار عملے میں جہاز کے ماسٹر شرما ششی بھوشن کے علاوہ دیگر 21 بھارتی عملے کے ارکان شامل ہیں، جن میں منوج کمار، بھالراو نیلیش مکند، نادر انتھونی میکسن ڈیوڈ، کولوسو سرینواس راؤ، ساگر گوراو اور دیگر شامل ہیں۔
ڈرگ انفورسمنٹ ایجنسی کے مطابق یہ کارروائی نائیجیریا میں منشیات کی بڑھتی ہوئی اسمگلنگ کے خلاف جاری سخت اقدامات کا حصہ ہے۔ ایجنسی نے بتایا کہ دسمبر 2025 میں بھی لاگوس کی ایک کورئیر کمپنی سے کیٹامین، ایکسٹسی اور ٹراماڈول کی گولیاں برآمد کی گئی تھیں، جو زیمبیا اور برطانیہ بھیجی جا رہی تھیں۔ نومبر میں ایجنسی نے 20 فلپائنی بحری عملے کو گرفتار کیا تھا، جو برازیل سے 20 کلو کوکین لا رہے تھے۔
مزید برآں، نائیجیریا کی ڈرگ انفورسمنٹ ایجنسی نے امریکی اور برطانوی انسداد منشیات ایجنسیوں کے ساتھ مشترکہ تحقیقات کے تحت لاگوس بندرگاہ پر ایک کنٹینر میں 1,000 کلو کوکین برآمد کرنے میں کامیابی حاصل کی تھی۔
یہ کارروائیاں نائیجیریا کے تجارتی راستوں کے ذریعے بین الاقوامی منشیات کی ترسیل کو روکنے کے لیے سخت حفاظتی اقدامات کی عکاسی کرتی ہیں اور بھارت سمیت دیگر ممالک کے عملے کی ملوثیت پر بھی سوالیہ نشان لگاتی ہیں۔
About The Author
