وزیراعظم شہباز شریف سے امریکہ پاکستان بزنس کونسل کے وفد کی ملاقات۔ وزیراعظم نے کہا مجھے اسلام آباد میں آپ کا استقبال کرتے ہوئے خوشی ہو رہی ہے۔ بزنس کونسل کا دونوں ملکوں کے درمیان اقتصادی تعلقات کو آگے بڑھانے میں اہم کردار ہے۔
وزیراعظم نے کہا امریکہ-پاکستان بزنس کونسل دونوں ممالک کے درمیان روابط کو آسان بنانے، شراکت داری کو مضبوط بنانے اور پاکستان میں سرمایہ کاری کو فروغ دینے کے حوالے سے ایک اہم پلیٹ فارم ہے۔ پاکستان میں 80 سے زائد امریکی کمپنیوں کی موجودگی اس بات کا ثبوت ہے کہ پاکستان کاروبار اور سرمایہ کاری کے حوالے سے ایک محفوظ اور منافع بخش ملک ہے۔
شہباز شریف نے کہا ہم پاکستان میں ملازمتیں پیدا کرنے، ریونیو میں حصہ ڈالنے اور علاقائی منڈیوں میں برآمدات بڑھانے کے لیے امریکی سرمایہ کاروں کی کوششوں کو سراہتے ہیں۔ امریکہ اور پاکستان کے درمیان اقتصادی اور اسٹریٹجک شراکت داری کی ایک طویل تاریخ ہے۔ ہم امریکی حکومت اور کاروباری اداروں کے ساتھ اپنے دھائیوں پر محیط تعلقات کی قدر کرتے ہیں۔
امریکی وفد سے خطاب میں وزیراعظم نے کہا جارتی اور سرمایہ کاری کے روابط کو بڑھا کر، ہم اپنے لوگوں کی بہبود، اپنے کاروبار کے منافع اور مشترکہ خوشحالی کے لیے دونوں ممالک میں کاروبار کے لیے باہمی طور پر فائدہ مند مواقع پیدا کر سکتے ہیں۔ ہماری شراکت باہمی طور پر فائدہ مند ہے۔ پاکستان کا شمار امریکی کپاس کے سب سے بڑے درآمد کنندگان میں ہوتا ہے۔
انہوں نے کہا میری حکومت امریکی حکومت، کاروباری اداروں، سرمایہ کاروں اور صنعت کاروں کے ساتھ تعمیری شراکت داری کی خواہشمند ہے تاکہ دوطرفہ تجارت اور اشیاء اور خدمات، خاص طور پر آئی ٹی کے شعبے میں سرمایہ کاری کا حجم بڑھایا جا سکے۔ پاکستان کی مارکیٹ نئی بیرونی سرمایہ کاری کے لیے تیار ہے۔
وزیراعظم نے کہا حکومت خصوصی سرمایہ کاری سہولت کونسل (SIFC) کے ذریعے سرمایہ کاروں اور تاجروں کے لئے ون ونڈو آپریشنز کی سہولت فراہم کر رہی ہے۔ پاکستان کی معیشت استحکام کی راہ پر گامزن ہے۔ عالمی مالیاتی ادارے پاکستانی معیشت میں بہتری کا اعتراف کر رہے ہیں۔۔
انہوں نے کہا فچ Fitch نے پاکستان کی خودمختار کریڈٹ ریٹنگ کو CCC+ سے B- میں اپ گریڈ کر دیا ہے۔ اسٹیٹ بینک آف پاکستان نے پالیسی ریٹ میں ایک فیصد مزید کمی کر کے اسے 11 فیصد کر دیا ہے جو کہ صنعتی اور کاروباری شعبے کے لئے انتہائی خوش آئند ہے۔۔
امریکی وفد میں وفد میں سینئر نائب صدر ایشیاء -امریکہ چیمبر آف کامرس چارلس فریمین ، ایگزیکٹو ڈائریکٹر ایشیاء ، صدر پاکستان-امریکہ بزنس کونسل اسپیرینزا گومیز ، ڈائیریکٹر گورنمنٹ افئرز ، ایبٹ انڈسٹریز ہینی ہینسر، ہیڈ آف پبلک پالیسی یوریشیا ، ایپل ، ایسرا کونی اور دیگر شامل تھے۔
ملاقات میں نائب وزیراعظم و وزیر خارجہ اسحاق ڈار ، وفاقی وزیر تجارت جام کمال خان، وفاقی وزیر اقتصادی امور احد خان چیمہ ، وفاقی وزیر اطلاعات و نشریات عطاء اللہ تارڑ ، وفاقی وزیر قومی غذائی تحفظ رانا تنویر، وفاقی وزیر توانائی سردار اویس احمد لغاری وفاقی وزیر انفارمیشن ٹیکنالوجی و ٹیلی کام شزا فاطمہ، وفاقی وزیر پیٹرولیم علی پرویز ملک ، وفاقی وزیر سائنس و ٹیکنالوجی خالد مگسی ، وفاقی وزیر قومی صحت سید مصطفیٰ کمال ، وزیراعظم کے مشیر ڈاکٹر توقیر شاہ ، وزیر مملکت ریلوے بلال اظہر کیانی ، وزیراعظم کے معاون خصوصی طارق فاطمی ، وزیراعظم کے معاون خصوصی ہارون اختر اور متعلقہ اعلیٰ سرکاری افسران بھی موجود تھے
وزیر اعظم نے وفد کے اعزاز میں عشائیہ بھی دیا۔
