تیرانا: البانیا میں کھیلے گئے ایک فٹ بال میچ کے دوران اسرائیلی ٹیم کو شدید عوامی ردعمل اور احتجاج کا سامنا کرنا پڑا، جہاں شائقین نے میچ کے مختلف مراحل میں اسرائیلی کھلاڑیوں کے خلاف نعرے بازی کی اور اپنی ناراضی کا اظہار کیا۔
میڈیا رپورٹس کے مطابق میچ شروع ہونے سے قبل اسرائیل کے قومی ترانے کے دوران اسٹیڈیم میں موجود بعض شائقین نے ہوٹنگ کی، جس کے باعث ماحول کشیدہ ہوگیا۔ بعد ازاں اسٹیڈیم کے مختلف حصوں میں دھکم پیل اور ہنگامہ آرائی کی اطلاعات بھی سامنے آئیں۔
میچ کے دوران بعض شائقین نے اسرائیلی کھلاڑیوں کی جانب کوڑا کرکٹ اور جوتے پھینکے، جس پر سیکیورٹی اہلکاروں کو صورتحال پر قابو پانے کے لیے متحرک ہونا پڑا۔
رپورٹس کے مطابق دوسرے ہاف میں اسرائیلی ٹیم کے ایک کھلاڑی نے گول اسکور کرنے کے بعد اپنی جرسی پر موجود لوگو کو بوسہ دیا اور مخالف شائقین کی جانب خاموش رہنے کا اشارہ کیا۔ اس عمل کے بعد میدان میں کشیدگی مزید بڑھ گئی۔
واقعے کے دوران البانیا کے بعض کھلاڑی اسرائیلی کھلاڑیوں کے ساتھ الجھ پڑے اور دونوں ٹیموں کے درمیان مختصر دھکم پیل بھی دیکھنے میں آئی، تاہم میچ آفیشلز اور سیکیورٹی عملے نے فوری مداخلت کرتے ہوئے صورتحال کو قابو میں کر لیا
About The Author
