Italy کے شہر Covo میں سکھ برادری کے ایک نمایاں رہنما راجندر سنگھ کو فائرنگ کر کے قتل کر دیا گیا، جس کے بعد مقامی کمیونٹی میں شدید تشویش کی لہر دوڑ گئی ہے۔
پولیس کے مطابق یہ واقعہ 17 اپریل کو اس وقت پیش آیا جب سکھ برادری Khalsa Day Nagar Kirtan کی تیاریوں میں مصروف تھی، جو اگلے روز منعقد ہونا تھا۔ نامعلوم حملہ آوروں نے راجندر سنگھ اور ان کے ساتھی کو نشانہ بنایا اور موقع سے فرار ہو گئے۔
حکام کا کہنا ہے کہ واقعے کے بعد علاقے میں سیکیورٹی سخت کر دی گئی ہے اور تفتیشی ادارے مختلف پہلوؤں سے تحقیقات کر رہے ہیں، تاہم تاحال قتل کی وجوہات کے بارے میں کوئی حتمی بیان سامنے نہیں آیا۔
راجندر سنگھ ماضی میں گردوارہ ماتا صاحب کور کے صدر رہ چکے تھے اور کمیونٹی میں ایک سرگرم اور بااثر شخصیت سمجھے جاتے تھے۔ ان کی ہلاکت کے بعد یورپ بھر میں مقیم سکھ برادری میں غم و غصہ پایا جا رہا ہے۔
دوسری جانب کچھ حلقے اس واقعے کو مختلف سیاسی زاویوں سے بھی دیکھ رہے ہیں، اورخدشہ ہے کہ سکھ رہنما کے قتل میں بھارتی ایجنسیاں ملوث ہوسکتی ہیں تاہم مقامی حکام نے عوام سے اپیل کی ہے کہ قیاس آرائیوں سے گریز کیا جائے اور تحقیقات مکمل ہونے تک صبر کیا جائے۔
انتظامیہ نے شہریوں سے یہ بھی کہا ہے کہ اگر کسی کے پاس واقعے سے متعلق معلومات ہوں تو وہ فوری طور پر قانون نافذ کرنے والے اداروں سے رابطہ کریں تاکہ ملزمان کو جلد گرفتار کیا جا سکے۔
About The Author
