بجٹ میں عوام کو ریلیف دینے کیلئے اقدامات کیے جارہے ہیں، وزیراعظم -

وزیراعظم شہباز شریف نے کہا ہے کہ بجٹ میں عوام کو ریلیف دینے کیلئے اقدامات کیے ہیں۔

وزیراعظم شہبازشریف سے اسلام آباد میں معروف صنعتکاروں اور ممتازکاروباری شخصیات کے وفد نے ملاقات کی۔ جس میں معاشی ترقی، وفاقی بجٹ کے حوالے سے مشاورت کی گئی۔ وفد میں میاں محمد منشا،عارف حبیب، عاطف باجوہ، محمد علی ٹبہ، مصدق ذوالقرنین سمیت اہم صنعتکار اور کاروباری شخصیات شامل تھیں۔

وزیر اعظم شہباز شریف نے ملک کے ممتاز صنعتکاروں اور کاروباری شخصیات کو ملک کا سفیر اور دنیا میں پاکستان کی پہچان قرار دیا ہے۔ مشکل معاشی حالات میں حکومت کا ساتھ دینے پر کاروباری برادری سے اظہار تشکر کیا۔ کہا حکومت اور نجی شعبے کی مضبوط شراکت داری معاشی ترقی کی ضامن ہے۔

وزیر اعظم نے وفد کا خیر مقدم کرتے ہوئے کہا پاکستان کی معیشت سے متعلق پالیسی سازی میں کاروباری برادری سے مشاورت انتہائی اہم ہے۔ بجٹ میں عوام کو ریلیف دینے اور غیر رسمی معیشت کو ٹیکس نیٹ میں لانے کیلئے اقدامات کیے جا رہے ہیں۔

وزیراعظم نے کہا کاروبار دوست پالیسیزکی بدولت ملکی معیشت مستحکم ہوئی اور بیرونی سرمایہ کاروں کا اعتماد بحال ہوا۔ برآمدات پر مبنی ترقی کی راہ پر گامزن ہیں یہی ہماری معاشی پالیسی کا محور ہے۔ صنعت، زراعت، انفارمیشن ٹیکنالوجی کے شعبوں میں ترقی سے معیشت کو مزید استحکام ملے گا اور روزگار کے نئے مواقع پیدا ہونگے۔

وفد نے ٹیکس اصلاحات اور کاروباری آسانیوں کے فروغ کے اقدامات کا خیرمقدم کیا۔ وفد کو کاروبار اور صنعت و تجارت کے فروغ سے متعلق حکومتی اقدامات پر بریفنگ بھی دی گئی۔